Me sem Yad Vashem – Rajko Djurić
Me sem Yad Vashem
Rat thaj praho mure vungendar
Mle palmende legarava.
Yad Vashem
Me hav jag
Pjiav thuv
Ano Auschwitz me mulem.
Me sem Yad Vashem
Upral e kokala sutem
Me jakha hasardem
Ki Treblinka me mulem.
Me sem Yad Vashem
Korkori man učhardem ratesar
Bi mortikako ačhilem
Ano Buchenwald me mulem.
Me sem Yad Vashem
Asvencar mli hiv ranglem
Mle cipibasar tručul kerdem
Ano Dachau me mulem.
Me sem Yad Vashem
Sa so sas man
Me hasardem
Ano Bergen-Belsen me mulem.
Me sem Yad Vashem
Bi anavesko
Bi vorbako
Me ačhilem
Ano Ravensbrück me mulem.
Me sem Yad Vashem
Kote semas
Me na džanav
Džanav numa kaj mulem.
Me sem Yad Vashem
O čeri pe phuv pelas
Ano tunjariko man phangle
Ano Lublin me mulem.
Me sem Yad Vashem
Mle andrunipa kotorkerde
An mande e čave von čhinde
Ano Jasenovaz me mulem.
Me sem Yad Vashem
Semas akate, semas okote
Ko kale, ravale rote
Praho thaj thuv ačhilem.
Me sem Yad Vashem
Sas man vilo Romano
Thaj sar Rom semas mudardo.
Me sem Yad Vashem
Rat thaj praho mure vungendar
Mle palmende legarava.
Me sem Yad Vashem
Sa džikote i phuv pes iranela
I thuv naj te učarel la.
Me sem Yad Vashem
Sa džikote o kham phekel
O Yad Vashem ka dživel.
Me sem Yad Vashem
Sa džikote o Devel si Devel
O Auschwitz našti pes bistrel.
Me sem Yad Vashem!